Harry Potter

Gespeichert von Webmaster am 7. Dezember 2010 - 17:51

Harry Potter, de Töverer

 

Wokeen weet noch, wat en Töverer is? Düt ole plattdüütsche Woort för "Zauberer" hebbt de mehrsten Lüüd meist vergeten. Man de Besökers vun de Lesung mit Hartmut Cyriacks un Peter Nissen weet nu Bescheed över den plattdüütschen Harry Potter.

De Kulturvereen "PEP" un de Stadtbökeri Kellinghusen harrn de beiden Plattmakers inlaadt, un dat weer en heel gode Idee. Jung un Old, so vun 7 Johr bit 70 Johr – weern dor un kregen veel to weten över dat Översetten vun Böker in't Plattdüütsche allgemeen un besünners bi "Harry Potter". Dat weer spannend un interessant, wat de beiden mit engelsche Namens in't Plattdüütsche maakt hebbt. So ward ut de Schoolmestersch för't Flegen, Mrs.Hooch, op plattdüütsch Madam Dunast – un dat dorüm, wiel dat engelsche Woort wat mit "Schnaps" to doon hett. An vele Bispillen verklaren Cyriacks un Nissen Spraakbiller un niee plattdüütsche Wöör, de bi't Översetten "rutklötert" kemen. Wat is denn woll en "Proppentrecker-Trepp"? Na kloor, en Wendeltrepp! De beiden wiesen, dat se mit de engelsche, de hochdüütsche un mit de plattdüütscche Spraak op't Best torechtkaamt.

Dat geev en Barg to högen un ok to begriepen –un de beiden Översetters smeten sik de Wöör un Utdrück man so to. Dat weer en Vergnögen, Harry Potters Beleevnisse op Platt vörleest to kriegen. Ok de ganz jungen Tohörers in de eerste Reeg, de Harry op hochdüütsch meist butenkopps kunnen, harrn ehren Spaaß un wurrn immer wedder anspraken. Bi en lütt Quiz mit swore Fragen över Platt un Potter müss de Bregen düchdig anstrengt warrn. Karin Glässner ut Kellinghusen weer de Best un wunn dat Book "Harry Potter un de Wunnersteen". Dat is dat erste Potter-Book un heet op hochdüütsch "Harry Potter und der Stein der Weisen".

Bi düt Book, dat nu al in de veerte Oplaag op den Markt is, un bi den tweeten Band "Harry Potter un de grulig Kamer" (op hochdüütsch "Harry Potter und die Kammer des Schreckens) ward dat na Menen vun Cyriacks un Nissen ok blieven. De annern dornah hebbt eenfach toveel Sieden. Mal sehn, wat de beiden Plattmakers sik noch allens utklamüstert!

Op en Bökerdisch vun de Bookhandlung Köhlmann geev dat de passlichen Böker för den Abend, so kunn en Geschenken köpen oder sik sülven en Leesvergnögen mit na Huus nehmen.

Oliver Zantow vun PEP un Marianne Ehlers vun de Stadtbökeri weern sik eenig över den feinen Abend. Ok in de tokamen Tiet wöllt se tohoop wat Plattdüütsches op de Been stellen. In Tieden, wo dat Geld knapper ward, is dat en gode Saak, de "Plünnen", will heten de Euros op en Dutt to smieten un miteenanner wat to beschicken. Seker is: Hartmut Cyriacks un Peter Nissen kaamt bestimmt mal wedder na Kellinghusen! Dat wünscht sik nich blots

Marianne Ehlers